89 ára gamalt vopnahlé

Ellefta nóvember 1918, fyrir sléttum áttatíu og níu árum, lauk Fyrri heimstyrjöld. Svona formlega séð - væntanlega fréttu ekki allir af því á sama tíma og börðust aðeins lengur. Þetta er skemmtileg bjartsýni í íslenskunni - það eru bara tvær heimsstyrjaldir, sú fyrri og sú seinni. Hér tölum við sko ekki um fyrstu og aðra heimsstyrjöld!

En hvernig má þá koma fyrir þeirri þriðju, ef hún skyldi nú skella á? Ætli það fólk sé til sem myndi hreinlega neita því að um heimstyrjöld sé að ræða? „Sjáið nú til: samkvæmt íslenskri málvenju eru aðeins tvær heimsstyrjaldir, eins og ljóslega má sjá af nöfnum þeirra, sem og orðabókarskilgreiningum á 'fyrri' og 'seinni'.“ Stundum þýðir bara ekkert að vísa í málvenju eða orðabækur. Hvers vegna reynir fólk það þá þegar verið er að tala um hjónaband?

Hversu stór þyrfti styrjöldin annars að vera til að mega kallast „heimstyrjöld“? Hversu víða þyrfti að berjast, hve margir þyrftu þátttakendurnir að vera? Eða er þetta kannske bara spurning um hve margir þyrftu verða fyrir áhrifum vegna hennar - og þá hve miklum áhrifum? Hryðjuverkastríðið mikla hefur nú áhrif á ansi marga - eigum við að kalla það heimsstyrjöld?

Eitt ætti að minnsta kosti að vera nokkuð ljóst. Það er engin lausn að fletta upp í orðabók til að komast að niðurstöðu.